O xoves día 6 de maio celebrouse no Salón de Plenos do Concello da Guarda unha sesión plenaria de carácter extraordinario cun punto único na Orde do Día sobre a análise da situación real e actual da adxudicataria Transgalaica, S.L. en relación ao servicio da piscina municipal de A Guarda, así como as solucións inmediatas a adoptar para a continuación do servicio municipal na piscina municipal.
Neste senso, O concello da Guarda está colaborando coa concesionaria da Piscina municipal a través de varias modificacións contractuais que se realizan no marco da necesidade de adoptar medidas urxentes e extraordinarias para facer fronte ao impacto económico do COVID 19 e garantir a continuidade do servizo ante a dificultade do concesionario da execución do contrato.
Así se realizaron dúas modificacións do contrato inicial da concesionaria da Piscina municipal, modificacións que contaron coa unanimidade de todos os grupos políticos da Corporación. Nelas acordouse unha redución do horario de 10 horas semanais; a anulación do canón do 13 % en consumos enerxéticos –ata agora ese canón repercutía na concesionaria– e a asunción polo concello dos gastos COVID 19 orixinados polo protocolo que houbo que implantar na Piscina.
Ademais o concello da Guarda propúxolle á concesionaria da Piscina Municipal, para paliar as consecuencias negativas froito do COVID 19, unha ampliación do contrato de concesión por un prazo de 2 anos, proposta que foi rexeitada pola concesionaria.
![](https://www.comarcasnarede.com/wp-content/uploads/2021/05/Pleno-A-Guarda.-Maio-2021-3-1024x768.jpeg)
Paralelamente o concello guardés vén traballando en proxectos cara a consecución da continuidade do servizo da Piscina municipal, servizo que conta cunha gran aceptación tanto polos veciños e veciñas da localidade como da comarca; cómpre salientar que máis do 30 % dos usuarios son de Oia o Rosal ou Goian.
Así o equipo de goberno, encabezado por Antonio Lomba, contratou en febreiro unha auditoría do estado da Piscina municipal. Despois de reunións coa empresa redactora da auditoría o concello acordou encargar dous proxectos, o primeiro para facer fronte ás necesidades máis urxentes e subsanar, no prazo de tempo máis curto posible, deficiencias que presenta a Piscina Municipal.
Unha vez recepcionado e cando se teña coñecemento do importe que acada o mesmo, o alcalde, Antonio Lomba, levará ao Plenario un suplemento de crédito con cargo ao remanente de tesourería positivo do 2020 para poder acometer as obras con recursos propios.
Pero ademais xa están pedidos orzamentos para poder encargar a redacción dun segundo proxecto, máis ambicioso, que acometa a mellora da eficiencia enerxética das instalacións e da envolvente da Piscina Municipal. Para este proxecto buscarase a colaboración dos próximos fondos europeos, Next Generation.
E nas últimas semanas a concesionaria municipal presentou a solicitude de reequilibrio económico, ante esta solicitude o alcalde pediu informes aos departamentos de Secretaría e Intervención do concello da Guarda para o seu análise, estudio e proposta. No día 14 de abril se enviou resolución á concesionaria para que aportase máis documentación, esta documentación foi presentada no concello da Guarda o día 23 de abril.
A intención do equipo de goberno é que, unha vez realizados os traballos técnicos, a proposta definitiva sexa obxecto dun acordo plenario, tendo sempre como obxectivo a continuidade na prestación do servizo na Piscina Municipal.
Ver Pleno