Co gallo do Día Internacional da Diversidade Funcional, que se conmemora o próximo 3 de decembro, Redondela acolleu este mediodía un acto organizado pola Asociación Andaina coa colaboración do Concello de Redondela. O presidente do colectivo, Antonio García, lembrou que é necesaria “unha educación máis inclusiva, con persoal que teña unha formación axeitada”, e demandou unha aposta polo emprego para as persoas coa diversidade funcional, con ofertas adaptadas “para unha sociedade unida, sen discriminación”.
No acto participaron usuarios de Andaina, que queren “derrubar barreiras” e tamén escolares dos centros IES Illa de San Simón e o CEP Santa Mariña, que reclamaron unha sociedade “máis xusta e solidaria” e comprometéronse a traballar para “desterrar a discriminación”. A alcaldesa Digna Rivas foi a encargada de pechar o acto cunha intervención na que agradeceu o traballo que fai Andaina “todos os días do ano” e reafirmou o compromiso do Concello “para facer de Redondela un lugar inclusivo, nunha sociedade xusta, que respecte as diferencias e as capacidades de todos e todas”.
