O Concello de Oia continúa desenvolvendo a súa campaña de compostaxe doméstica distribuíndo, de xeito gratuíto, composteiros individuais entre as persoas que o soliciten. As solicitudes poderán presentarse no Concello ata o día 31 de xaneiro. O Concello anima á veciñanza a empregar estes dispositivos nos seus fogares e lembra que a compostaxe é unha oportunidade para reciclar os residuos orgánicos: o compost que se fabrica (rico en materia orgánica e minerais) pode ser reutilizado nas hortas domésticas por ser un bo fertilizante para o solo.

O xurado do concurso de debuxo infantil 'Os Reis Magos chegan a Oia', elixiu o traballo presentado por Mateo Gómez Giráldez, alumno de 6º curso de Educación Primaria do CEIP de Refoxos, como gañador do certame e, polo tanto e segundo establecen as bases, ilustrará o cartel anunciador da Cabalgata de Reis do 2019.

O Concello de Oia vén de abrir a inscrición para un obradoiro de creación de xoguetes tradicionais no Nadal, que se celebrará dentro da Semana Cultural que desenvolve a Asociación Veciñal de Mougás, nunha actividade organizada polo Concello dentro do programa «Tecendo Lazos» da Deputación de Pontevedra. O prazo de inscrición estará aberto ata o vindeiro 30 de novembro.